Набавка – преглед
Набавниот процес ги води документите од нарачката кон добавувачот, преку приемот на стоката во магацинот, до фактурата од добавувачот и нејзиното плаќање. Сите набавни документи се во менито .
Тек на документите
- Набавна нарачка – што нарачувате од добавувачот, по кои цени и количини.
- Приемница – стоката влегува во магацинот.
- Набавна фактура – обврската кон добавувачот. Се прави од нарачката, од приемницата или директно.
- Плаќање – исплатата кон добавувачот се евидентира на банкарскиот извод и се поврзува со фактурата.
Секој чекор може да се прескокне: на пример, фактура со приемница може да се внесе директно, без нарачка. Секој документ што е направен од друг ја чува врската кон него, па низ целиот тек може да се движите од документ до документ.
Податоци од документот на добавувачот
Секој набавен документ го носи бројот, датумот и износот од документот на добавувачот, во делот Надворешен документ: Број, Датум и Износ. Без нив документот не може да се процесира, а апликацијата пријавува дека недостасуваат надворешни податоци за набавниот документ.
- Износот е износот што го должите според документот на добавувачот. Тој не смее да се разликува од вкупниот износ на документот за повеќе од 1%.
- Истата фактура од добавувач не може да се процесира двапати: ако добавувачот веќе има процесирана набавна фактура со ист надворешен број во истата година, процесирањето е одбиено. Проверката може да се исклучи во поставките на компанијата.
Статуси
Нарачката минува низ одобрување: Во изработка → (Во процедура / Се чека одобрување) → Одобрена. Од одобрената нарачка се прават приемниците и фактурите.
| Документ | Статуси по одобрувањето |
|---|---|
| Набавна нарачка | Парцијално процесирана, Целосно процесирана (сè е примено и фактурирано), Откажана, Истечена, Сторнирана |
| Приемница | Чека за прием, Примена (стоката е примена, сè уште нема фактура), Чека за прием(Процесирана фактура), Затворена (примена и фактурирана), Сторнирана |
| Набавна фактура | Процесирана (сè уште нема приемница), Процесирана(Чека за прием), Затворена (процесирана и примена), Книжена, Сторнирана |
Документите со Тип на калкулација Девизна калкулација (увоз) минуваат и низ Чека за калкулација. Тие ќе бидат опишани на посебна страница.
Други набавни документи
Во истото мени се и набавните понуди и договори, повратните нарачки, одобренијата, набавните повратници, сметкопотврдите, авансните фактури, задолженијата и работниот лист за набавка. Тие ќе бидат опишани во посебни страници.